A Garda Civil detivo a dous veciños de Barcelona como presuntos autores do furto dun colar de ouro a unha muller de 95 anos na localidade coruñesa de Oleiros. Segundo informa a Benemérita, o método utilizado para cometer o acto delituoso foi o denominado ‘furto do abrazo’. Así, todo ocorreu a finais do mes de maio, cando a vítima, mentres paseaba pola zona de Santa Cristina, foi abordada por unha muller nova.

“Esta mostrouse excesivamente cariñosa, realizando caricias nas mans e o pescozo da anciá, para finalmente abrazala. Acto seguido, a moza realizou un movemento brusco e fuxiu precipitadamente nun vehículo que a esperaba, decatándose a vítima nese instante da ausencia da súa cadea de ouro”, indica a Garda Civil.

Tras a denuncia interposta pola anciá, iniciouse a investigación, buscando posibles cámaras de seguridade e testemuñas que puidesen presenciar os feitos. As pescudas culminaron coa identificación dos autores, quen resultaron ser veciños de Barcelona e delincuentes habituais, coñecidos por desprazarse por todo o territorio nacional para levar a cabo este tipo de furtos. Xa foron postos a disposición xudicial.