O Concello da Coruña esixirá a 15 concesionarias que salden as súas débedas coa administración antes de xaneiro de 2026, segundo informa o goberno local. O plan de regularización das concesións inclúe, ademais, a posibilidade de rescatar todos aqueles bens cedidos cuxos adxudicatarios non cumpran coas condicións establecidas nos contratos.
O goberno local remarca o feito de que, “dentro do exercicio de transparencia sobre as concesións municipais” que está a levar a cabo o consistorio, este luns se tivesen feito públicos por primeira vez os datos das concesións que non estean ao día das súas obrigacións económicas recollidas nos correspondentes contratos.
Respecto diso, apunta que “das 105 concesións que xeran actividade económica, e que suman 4,3 millóns de euros anuais en canons, 15 acumulan falta de pagamentos coa Administración local”. Todo iso despois de que a Xunta de Goberno local aprobase a semana pasada unha instrución específica para ordenar as concesións municipais creando un novo marco normativo que, coa súa posta en marcha, inclúe a creación dun rexistro público e actualizado de todas elas cada ano.
