Anunciou onte o Concello da Coruña unha nova mellora no servizo municipal BiciCoruña. Ás 49 bases activas coas que conta actualmente, pronto se sumarán outras 13 (algunha con enerxía solar) nos barrios do Castrillón, Novo Mesoiro, Monelos, Monte Alto, Pedralonga, Palavea, os Rosales, Lonzas, os parques de Bens e Vioño e o Barrio das Flores.
O Concello quere celebrar o 3º aniversario da primeira renovación do servizo, realizada en 2022, e que permitiu triplicar o número de ciclousuarios na cidade, ata os 15.000 actuais. O servizo suma 160.000 viaxes mensuais e bateu o récord de usos nunha mesma xornada, con máis de 7.000 nun día.
Un dos grandes fitos dos que pode presumir o goberno socialista actual é do ampliación da rede ciclable da cidade, que supera xa os 56 quilómetros, máis do dobre da que había no ano 2019, cando había 23. Unha rede que permite que cada vez haia máis xente que se atreva a deixar o coche na casa e usar a bici como medio de transporte urbano, non só a través das bicis municipais, senón tamén a través das bicis propias.
Mapa Coruña Minuto
E para seguir fomentando o uso, o concello vén de ofrecer unha ferramenta para coñecer os itinerarios e os tempos. O mapa Coruña Minuto, coma se fose o mapa do metro da cidade, amosa moitos dos trazados e das rúas peonís da cidade, como a famosa Rolda Peonil entre o Parque do Observatorio e o Parque de San Diego, ideais para bicis ou patinentes.
