A Axencia Española de Protección de Datos (AEPD) multou con 96.000 euros á cadea de ximnasios Supera por impor o recoñecemento facial no acceso ás súas instalacións tras a denuncia realizada por Facua-Consumidores en Acción.

En concreto, a sanción, tres multas por valor de 80.000, 50.000 e 30.000 euros, respectivamente que sumaban 160.000 euros, quedou finalmente reducida nun 40% dado que a empresa propietaria, Sidecu SA, con sede na Coruña, recoñeceu a infracción e realizou o pago voluntario.

A organización de consumidores denunciou esta situación en 2023, tras ter coñecemento a través dos seus socios de que os establecementos desta cadea de ximnasios implantaran un sistema de recoñecemento facial como única forma de permitir o acceso, tras considerar que se estaba realizando un tratamento ilícito dos datos biométricos dos usuarios, o que consistía unha vulneración da normativa de protección de datos.

A empresa, con sede na Coruña, ten 30 centros repartidos por 21 municipios como A Coruña, Alacante, Almería, Burgos, Chiclana de la Frontera, Estepona e Marbella, Guadalaxara, León, Móstoles, Oviedo, Palencia, Parla, Rivas-Vaciamadrid, Talavera de la Reina, Valdemoro, Santander, Sevilla, Toledo, Valencia e Valladolid.

A AEPD confirmou que efectivamente existiu unha vulneración da norma nos feitos denunciados por Facua. En concreto, tres infraccións do Regulamento Xeral de Protección de Datos (RGPD) por ter vulnerado artigos referentes á prohibición de tratamento de determinados datos sen solicitar o consentimento expreso, entre outros.

Na súa resolución, a AEPD sinala que os datos biométricos, sempre que se traten coa finalidade de identificar a unha persoa -como no caso dun control de acceso-, entran dentro da categoría de datos de carácter persoal de categoría especial, segundo recolle o artigo 9 do RGPD, cuxo tratamento está xeralmente prohibido.