Un ano máis, a orixinal e auténtica Feira Alfaroleiros encheu de vida as rúas de Santa Cruz nestes primeiros días de agosto. Unha cita imprescindible para centos de familias de toda a área herculina, que non dubidan en pasar a ollar as últimas tendencias oleiras de todo o estado, e para seguir aumentando a lacena.

Unha feira ideada hai máis de 30 anos para preservar a memoria cultural da olería e loitar contra a invasión dos plásticos.

O mércores abría co Parque Luis Seoane completamente cheo de pezas de barro: produtos de múltiples tamaños, prezos e funcións, desde as máis operativas na cociña de hoxe, como viratortillas, ensaladeiras, cuncas, tazas ou xerras, até pezas decorativas, creativas, luxosas ou exclusivamente dedicadas a representar algún aspecto do Concello de Oleiros. Un escaparate único para que calquera visitante puidese levar un recordo especial desta feira con tanta personalidade.

A presenza de visitantes foi constante ao longo dos cinco días, tanto en horario de mañá como de tarde, e todas as actividades paralelas rexistraron unha alta participación. A feira respondeu, coma sempre, á súa función socioeconómica e turística, ao converter Santa Cruz en visita habitual para moitas persoas que gozan da artesanía e a cultura, pero tamén da paisaxe, a gastronomía e as hospedaxes da contorna.

Resulta imposible saber con exactitude cantas pezas se venderon, pero hai un dato que fala por si só: as 6.000 bolsas oficiais da feira, repartidas entre os alfares para entregar as súas creacións, esgotáronse antes do remate. Isto confirma que as vendas se contaron por milleiros, o que representa un importante impulso económico para o sector artesán. Armando Moita Domingues, alfar procedente de Coimbra (Portugal), sinalou que só nos dous primeiros días de feira, xa vendera máis que en toda a edición anterior. Todo un éxito.