O grupo municipal do Partido Popular do Concello da Coruña presentará no próximo pleno unha iniciativa coas reclamacións de veciños das rúas da Torre e Orillamar, quen denuncian “deficiencias en beirarrúas, mobiliario e zonas verdes por un inadecuado mantemento” na súa zona.
Nun comunicado, a formación política apunta a “beirarrúas rotas e sucias, farois con cables ao aire ou con tapas improvisadas, colectores oxidados, acabados defectuosos en obras municipais e árbores sen podar que se coan nas vivendas”, entre outras incidencias.
Así mesmo, sinala que os cidadáns reclaman a recuperación da Policía de Barrio para que “o carácter preventivo da súa presenza garanta a seguridade”.
Por iso, o portavoz do grupo municipal do PP, Miguel Lorenzo, comprometeuse cos veciños a presentar as súas reclamacións ao goberno local no próximo pleno.
