A Coruña acolle este domingo, día 31, ás 12.00 horas a celebración da LXXXIV edición da Travesía a nado á Enseada de San Amaro coa participación de 300 deportistas e tras a cancelación da pasada edición por precaución sanitaria.

Segundo informa o consistorio, a proba desenvolverase en augas abertas na contorna da baía, ofrece un percorrido en forma de triángulo e está aberta a nadadores de diferentes idades, “promovendo tanto a participación popular como a práctica deportiva en contornas naturais”.

O Concello herculino colabora con este evento organizado polo Club do Mar de San Amaro, xunto cos equipos de Protección Civil, Cruz Vermella e a Federación de Salvamento e Socorrismo de Galicia (FESSGA), que reforzarán a seguridade do acto con medios acuáticos e asistencia técnica.

“Esta proba consolídase como un referente no calendario estival da cidade, tanto pola súa tradición — con 84 edicións celebradas — como polo seu valor na promoción do deporte ao aire libre e o vínculo coa contorna costeira de barrios como Monte Alto ou Durmideiras”, apunta o consistorio.