Presentou esta pasada fin de semana o cartel definitivo do festival Noites do Porto. Fíxoo nun acto no UmmaGumma, pero con protagonismo para o Bristol Bar, un dos grandes epicentros musiqueiros na cidade, que ademais vivirá unha noite moi especial o 27 de setembro: o concerto do cabeza de cartel do festival (La Casa Azul fará no peirao de Batería a súa única parada en Galicia da xira do seu 25 aniversario) rematará celebrando o 30 aniversario do bar da rúa Torreiro.

13 escenarios

O festival indie, dirixido por Héctor César, pecha así o cartel dunha quinta edición que se expandirá a varias salas da cidade da Coruña, ata abarcar 13 escenarios. É precisamente esa aposta por recoñecer e poñer en valor o traballo das nosas salas o máis destacado do festival.

As nove noites de música en directo tamén estarán acompañadas de sesións musicais comisariadas ofrecidas por comisarios locais, nacionais e internacionais como parte da cápsula Noites nos Bares. Callum Brown, Ryan Scott, Vanne Vamp, Ángel Snap, Txetxu el Tigre, Gulya e Los Bundy, entre outros, únense á quinta edición dun festival que ademais do Jazz Filloa, o Garufa Club, o Playa, a Sala Inn, a Mardi Gras, tamén chegará a locais de hostalería e establecementos como Bristol Bar, Don Giorgio, El Calvario Vintage, La Chela, Los Tigres e Rosmon Burger.