O grupo municipal do BNG do Concello da Coruña fixouse como obxectivo constituírse como “alternativa de goberno” e ser a “forza que lidere” a cidade herculina “despois das próximas eleccións”. Mentres, ofreceu ao goberno local diálogo para negociar o orzamento de 2026. “A pelota está no tellado do PSOE”, afirma o seu portavoz, Francisco Jorquera.
A formación asegura, nun comunicado, que afronta con “moita ilusión e con moita responsabilidade” o novo curso político co propósito “claro” de “dotar A Coruña da alternativa de goberno local que precisa”. Así mesmo, continuarán co seu “rol” de oposición, de “crítica e fiscalización”, pero con “plena disposición a garantir a gobernabilidade do Concello”.
Para Jorquera “hai que contar co BNG se se queren sacar os temas adiante“. “Se o goberno local cumpre os compromisos aos que chegou no seu momento co BNG, se ten vontade de dialogar e de cumprir o acordado, tamén temos a disposición de contribuír a que as cousas saian adiante e con esa disposición afrontamos este novo curso político”, apunta.
En canto aos orzamentos de 2026, remarca que “a pelota está no tellado do PSOE”. Nese sentido, lembra que se o BNG non negociou os orzamentos de 2025 foi por observar que o goberno municipal “incumprira sistematicamente os acordos asinados co Bloque o que motivou unha lóxica quebra de confianza”.
No entanto, sinala que “nos últimos tempos deuse impulso a medidas que figuraban no Acordo de Investidura e levaron a pleno tamén cuestións que eran froito dunha negociación previa”. Neste sentido, asegura que se os socialistas continúan “nesta liña de rectificación” e cumpren os termos do devandito pacto e do acordo sobre os orzamentos 2024, o BNG “ten a mellor disposición a negociar co PSOE uns novos orzamentos para 2026”.
