Continúan as homenaxes ao Tío Benito do Santo, que comezaron en xuño de 2024 coa iniciativa dunha das súas bisnetas, Emilia Seoane (Piruca) na súa casa de Curtis cun mural realizado por Sfhir, artista mundialmente recoñecido e galardoado.
Nesta ocasión e por segundo ano consecutivo, decenas de familiares de Benito Seoane Paredes “o Tío Benito do Santo”, residentes en distintos lugares (Tenerife, Hawai, Laudio, Ourense, Ferrol, Santiago, A Coruña, Curtis,…) reuníronse o sábado 6 de setembro na II Comida Familiar que tivo lugar na parrillada Agarimo de Curtis. Unha familia que demostra así o seu sentimento identidade e orgullo comunitario do que son legatarios por parte do seu bisavó e tataravó Benito.
Netas políticas, bisnetas e bisnetos, tataranetas e tataranetos queren continuar recordando e rendendo homenaxe a unha figura emblemática e moi querida en Curtis, pola súa xenerosidade e espírito comunitario materializado na doazón de terreos fundamentais para o desenvolvemento desta vila nos comezos do século XX. O seu legado perdura na memoria dos habitantes de Curtis quen o recordan con gratitude.
Ademais de menú e mesa tamén se compartiu xenealoxía familiar -con datos de ata 10 xeracións de ascendentes e descendentes de Benito Seoane e a súa dona Ángela Sánchez Rendal-, proxección fotográfica de Benito e dos seus descendentes ao tempo que se entregou a todas as persoas asistentes unha semblanza do Tío Benito do Santo.
Máis novas
Curtis xa ten un mural de referencia na honra do Tío Benito do Santo
