A portavoz nacional do BNG, Ana Pontón, esixiu á Xunta “prazos reais” sobre a ampliación do complexo hospitalario universitario da Coruña (Chuac) e anunciou iniciativas no Parlamento galego a este respecto. Fíxoo con motivo dunha reunión coa Xunta de Persoal do Chuac e nunhas declaracións aos medios de comunicación nas que asegurou que “se anunciou que en 2025 o 80 % das obras estarían realizadas”.

“Estamos a acabar 2025 e o que podemos ver é que só se executou o 5 % desas obras e o máis lamentable é que, ante o atraso, o Goberno de Rueda diga que están orgullosos do ritmo das obras”. Fronte a iso, manifestou que si existe “preocupación” entre os galegos e galegas que reciben asistencia neste centro “e que ven que só hai atrasos”.

“No canto dun novo hospital, hai un gran buraco e uns valos”, sentenciou para indicar que levarán este asunto ao Parlamebto galego para esixir á Xunta “explicacións de anuncios propagandísticos e demandar que haxa prazos reais destas obras”. Ademais, acusou ao PP de facer “promesas que non cumpre”. “E iso repercute na atención sanitaria”, apostilou.