A Audiencia Provincial da Coruña celebrará o venres o xuízo, a porta pechada, contra un home para o que piden sete anos de prisión por captación/utilización dunha menor de 16 anos con fins de obter material de abuso sexual infantil. Segundo o Ministerio Fiscal os feitos sucederon no verán de 2022 a través dun teléfono móbil e o home tamén está acusado dun delito de exhibicionismo.

Ademais, pide para o acusado a prohibición de achegarse a menos de 300 metros da vítima, en calquera lugar onde se atope, así como ao seu domicilio e calquera outro lugar que sexa frecuentado por ela e de comunicarse con ela por calquera medio de comunicación ou medio informático ou telemático, contacto escrito, verbal ou visual por un período de 15 anos.

Tamén a súa inhabilitación especial para calquera profesión, oficio ou actividades, sexan ou non retribuídos, que leven contacto regular e directo con persoas menores de idade por un tempo de 16 anos.

O home tamén se enfronta a sete anos de liberdade vixiada que se executará con posterioridade á pena privativa de liberdade e deberá indemnizar á vítima, nas persoas dos seus representantes legais, na suma de 3.000 euros polos danos e prexuízos ocasionados.