O Observatorio Coruñés contra a LGTBIfobia rexistrou en 2024 un total de 42 incidentes de odio en Galicia, dos cales 33 foron agresións directas á comunidade LGTBI. Así o detallaron a presidenta da asociación Ás Coruña, Ana García Fernández, e a concelleira de Igualdade, Nereida Canosa, durante a presentación do sétimo informe anual no Concello da Coruña. O estudo recolle 205 casos atendidos ao longo do ano mediante 294 intervencións, o que supón case catro novos casos por semana.
A cidade da Coruña concentrou 18 incidentes, con 14 agresións, e por quinto ano consecutivo a vía pública foi o escenario máis habitual, seguida dos espazos domésticos e de lecer. O informe non rexistrou agresións sexuais en 2024, aínda que desde Ás Coruña advertiron de que a ausencia de denuncias non significa que non se producisen. Tamén subliñaron a necesidade de reforzar a presenza e o apoio institucional en provincias como Lugo e Ourense, onde a comunidade LGTBI conta con menos recursos de acompañamento.
As demandas máis frecuentes foron o asesoramento social, seguido do sanitario e do legal, ademais de consultas relacionadas coa educación e o ámbito laboral. O perfil das persoas atendidas vai desde un menor de 12 anos ata unha persoa de 70, cunha media de idade de 32 anos. Pola súa banda, a concelleira Canosa valorou a lixeira baixada de casos de odio respecto a 2023, pero advertiu de que non se debe caer no “triunfalismo” e apelou a manter o traballo constante en materia de igualdade e protección da diversidade.
