A Sala do Civil e Penal do TSXG confirmou a sentenza da sección sexta da Audiencia provincial da Coruña na que condena a 23 anos e medio de cárcere ao propietario de varios locais de hostalaría por cometer dous delitos continuados de agresión sexual sobre dúas empregadas.

O acusado, segundo recolle a sentenza, era o xefe das dúas vítimas e, sendo coñecedor da súa situación económica precaria, ameazábaas con que perderían o traballo se non facían o que el lles pedía. O investigado agrediunas sexualmente en numerosas ocasións durante anos.

Desta forma, a sala rexeita o recurso de apelación presentado pola defensa do condenado e subliña que a Audiencia foi “minuciosa na análise da proba, desagregando todos os feitos en profundidade”.

Os maxistrados apóianse nas testificais dos peritos e nas declaracións das vítimas, así como nas realizadas por persoas que traballaban con elas, que, aínda que non estiveron presentes nas ocasións nas que se producían os feitos denunciados, eran conscientes da situación de “tensión” e de incomodidade que había no lugar de traballo.

A sentenza non é firme, xa que é recurrible ante o Tribunal Supremo.