Dúas delegacións dos Concellos da Coruña e Oleiros acodiron esta mañá de venres 17 de outubro á entrega dos Premios Cidades que Camiñan 2025, celebrada en Cádiz. Uns Premios que, baixo o lema “Camiñando a fronteira”, tratan de poñer en valor as accións de humanización e promoción de hábitos de vida saudable das administracións máis próximas.

A Pecadería da Coruña

A cidade da Coruña foi recoñecida na categoría de urbe de máis de 100.000 habitantes pola transformación do barrio da Pescadería, un proceso de reurbanización integral que reflicte o compromiso municipal cun modelo urbano máis humano, accesible e sostible.
A candidatura coruñesa, titulada “Pescadería, un barrio que se transforma para as persoas”, puxo o foco nas intervencións, cheas de cemento, levadas a cabo nas rúas Compostela, San Andrés e os Cantóns, tres espazos emblemáticos do centro urbano que foron obxecto de actuacións orientadas á recuperación do espazo público, a mellora da accesibilidade e a reorganización da mobilidade.

Este é o segundo ano en que A Coruña recibe este recoñecemento, despois do premio outorgado en 2022 pola creación da Rolda Peonil.

O paseo fluvial de Iñás e Nós de Oleiros

Pola súa parte, Oleiros recibiu o premio na modalidade de concello mediano pola creación do paseo fluvial de Iñás e Nós, como un itinerario alternativo á NVI. Unha senda que facilita a mobilidade natural durante 4 km desa estrada radial por un camiño libre de coches e ruídos, que decorre entre bosques polo interior sur do concello conectando O Seixal con Iñás, e todos os núcleos e urbanizacións que hai ao longo do percorrido.