Axentes da Policía Nacional detiveron a dous homes por roubar a un turista as súas pertenzas no despacho de billetes da estación de autobuses da cidade. Segundo informa a Xefatura Superior de Policía en Galicia, forzaron a fechadura para subtraer toda a súa equipaxe.
A Policía Nacional conta entre os seus equipos coa Unidade Especializada da Brigada Móbil-Policía no Transporte, responsable da prevención da delincuencia común e organizada itinerante, mediante rexistros e controis aleatorios de viaxeiros e equipaxes, así como a asistencia e auxilio humanitario, sendo a súa zona de actuación todas as instalacións de transporte público.
Dentro do Plan de Turismo Seguro, o pasado mes, funcionarios policiais desta Brigada Móbil foron requiridos por unha cidadá estranxeira que se atopaba de turismo na cidade da Coruña. A vítima relatou que lle subtraeron a súa equipaxe e todos os seus aveños persoais do interior dos despachos de billetes da estación de autobuses, entre os que se atopaba un dispositivo informático de traballo con información sensible e de transcendencia.
En colaboración con persoal de seguridade privada e unidades do Grupo de Atención ao Cidadán, conseguiuse identificar aos presuntos autores do roubo. Tras unha investigación máis exhaustiva, axentes adscritos á Brigada Móbil lograron determinar a localización dos mesmos, quen residían nunha localidade limítrofe da provincia da Coruña. Por este motivo levou a cabo un dispositivo policial na zona que concluíu coa detención dos dous autores.
