Unha exposición, que conmemora o 250 aniversario da creación do Arquivo do Reino de Galicia, permitirá visitar na Coruña un percorrido con 61 documentos e 16 obxectos “singulares da historia de Galicia desde 1775 ata a actualidade”. A mostra estará dispoñible ata o día 30 de xaneiro.
Tal e como trasladou a Xunta nunha nota de prensa, o conselleiro de Cultura, Lingua e Xuventude, José López Campos, asistiu este mércores á inauguración, onde destacou o papel do Arquivo ao “salvagardar a historia galega”.
Trátase dunha selección que provén dos fondos públicos, privados e as coleccións do Arquivo do Reino de Galicia e que supoñen unha representación dos algo máis de 550 que custodia a día de hoxe. Entre os obxectos que contén atópanse expedientes xudiciais e textos de fondos públicos vinculados a Facenda, Goberno Civil ou á Real Audiencia de Galicia. Ademais, complétase con fotografías estereoscópicas en visor, imaxes audiovisuais e outros documentos.
Durante a súa intervención, López Campos subliñou ao Arquivo como “exemplo de transmisión cultural, non só pola conservación de documentos históricos, senón tamén polo seu labor divulgativo” e fixo fincapé no servizo que presta a estudiosos como centro de documentación. Así mesmo, sinalou o conselleiro, propostas como a mostra permitirán ao público “achegarse aos seus fondos a través dunha selección de pezas coas que descubrirán escritos que esconden curiosidades que axudan a comprender acontecementos pasados”.
