Novo tenso pleno o que se está a desenvolver este xoves 6 de novembro no Pazo de María Pita (ás 15:15h retómase a segunda parte do mesmo). Un pleno no que a conxelación das taxas e tributos municipais para o 2026 foi o punto máis destacado, pero que volveu verse empañado pola tensión entre os voceiros municipais de PSOE e PP, José Manuel Lage Tuñas e Miguel Lorenzo, que non deixaron de acusarse con alusións mesmo persoais de mentir, de falta de intelixencia…

Con todo, como dicimos, a conclusión máis importante do pleno foi a aprobación de varias taxas que quedan conxeladas para o ano 2026 (agás a do SAF, que ten que subir a súa contía por unha imposición pola Xunta). A da rede de sumidoiros, a de extinción de incendios, o catálogo de servizos domiciliarios, a prestación de museos e outras instalacións culturais, todas foron aprobadas cos votos a favor de PSOE e BNG e a abstención do PP.
Tamén se aprobaron, neste caso cos votos en contra do PP, que volveu incidir na “non execución” dos orzamentos, dous novos modificativos de crédito, para asumir varios créditos bancarios.

MC2

Tamén se aprobou a adhesión dos Museos Científicos Coruñeses (que a vindeira semana abren as súas portas á veciñanza) á Asociación de Museos y Centros de Ciencia y Técnica de España.
O BNG apoiou a moción pero lembrou a necesidade de afrontar a falta de mantemento dos edificios, actualización de contidos, renovación de partes expositivas; así como actualizar a RPT. Tamén o PP lamentou o mal estado das infraestruturas e pediu unha urxente redefinición dos espazos.

Urbanismo

Houbo unanimidade para aprobar sendos estudos de detalle en Someso e Peñarredonda I, cumplindo o PXOM, este último que facilitará o desenvolvemento urbanístico de tres parcelas próximas á rúa Hamburgo.
Interesante o punto do concelleiro de urbanismo Fran Dían Gallego, que deixou patente que aínda queda varias parcelas urbanizables en Someso para construír 500 vivendas (en 9 torres de 22 e 32 alturas) que non recibiron solicitude de licenza.

As VTC

Volveu ao pleno a situación de incerteza que vive a cidade arredor dos Vehículos con Condutor. Uns VTC que andan pola cidade, facendo viaxes urbanas sen ningún pudor a pesar de que as normativas municipal e a autonómica indican que se non hai ordenanza concreta só poderían facer viaxes interurbanas. Foi o BNG (e foi aprobada por unanimidade) o que presentou unha moción contra a pasividade do Goberno local ante a actuación ilegal dos VTC, pedindo que o Concello sancione os incumprimentos e actualice a normativa.
Deu numerosas razóns a edil nacionalista Avia Veira sobre a discriminación co sector do taxi: os VTC poden ser renting mentres que os taxis son en propiedade; os VTC non necesitan Inspección municipal; os condutores das VTC non teñen esixencia e os taxistas teñen un exame e teñen que ter 5 anos de antigüidade no carnet; os VTC dependen de multinacionais e os taxistas son autónomos que cotizan e pagan taxas aquí; os VTC multpiplícanse sen preguntar e o número de licenzas de taxis están controlados; os VTC cambian os prezos ao seu antollo “segundo demanda”, mentres que os taxis teñen prezos regulados polo Concello; ou os VTC teñen seguro de frota e os taxistas teñen un seguro de responsabilidade civil.

O PP aprobou a moción pero lembrou que os dous grupos de PSOE e BNG veñen de aprobar unha ordenanza de mobilidade sostible hai apenas 2 meses… deixando patente o seu apoio á chegada destas empresas á cidade.

Pola súa parte, a concelleira Noemí Díaz ratificou o apoio ao taxi, presentando unha emmenda de substitucion nese sentido, e aproveitou para mandar recado á Xunta. que é a que admite o aumento de licenzas (“disque hai 800 novas licenzas pero non se sabe en que cidades”) sen falar cos concellos, e agora pon nos Concellos a responsabilidade da súa regulación. Asegurou que a FEGAMP está preparando levar unha ordenanza común á Xunta, pedindo un estudio serio da necesidade do servizo interurbano.

Mercado de Monte Alto

Entre os anuncios na parte das cuestións, á preguntas do PP o voceiro municipal asegurou que na segunda quincena de decembro os praceiros volverán ao Mercado de Monte Alto.

Máis novas

Alertan da intención municipal de abrir o transporte público á competencia privada