Arrincou o Ciclo de conferencias “Castelao e o seu tempo”. A Casa Museo Casares Quiroga acollía onte a mesa redonda ‘Exilio e memoria’ co gallo de seguir conmemorando o 75 aniversario do falecemento do intelectual rianxeiro.
A sesión centrouse na análise do papel do exilio na construción da identidade galega contemporánea e na recuperación da memoria colectiva, un dos eixos fundamentais da obra e do compromiso político e humano de Alfonso Daniel Rodríguez Castelao.
Na mesa redonda desta tarde participaron o concelleiro de Cultural Gonzalo Castro, Xosé Manuel Núñez Seixas (catedrático de Historia Contemporánea na Universidade de Santiago de Compostela), Miguel Anxo Seixas Seoane (historiador da arte e presidente da Fundación Castelao) e o alcalde de Rianxo, Julián Bustelo Abuín.
O ciclo “Castelao e o seu tempo” está organizado pola Fundación Castelao e polo Instituto José Cornide de Estudos Coruñeses, coa cofinanciación do Concello da Coruña e a colaboración da Secretaría Xeral de Política Lingüística autonómica, o Consello da Cultura Galega e a Real Academia Galega, no marco do Ano Castelao 2025.
