A alcaldesa da Coruña, Inés Rey anunciou que o fallo do concurso internacional para a redacción do plan que definirá os futuros usos dos peiraos interiores do porto da cidade herculina notificarase en “outono do ano 2026”. Foi a comezos de mes cando se pechou o prazo de presentación de equipos redactores.
Será “no outono de 2027” cando se presente o Máster Plan de quen fose seleccionado, engadiu.
Fíxoo a preguntas dos xornalistas sobre este asunto tras a presentación da programación de Nadal. “Agora, hai que analizar detidamente, por parte dunha comisión independente, esas candidaturas que se presentaron ao concurso”, expuxo.
Cuestionada tamén pola súa intervención, xunto ao presidente da Autoridade Portuaria da Coruña, Martín Fernández Prado, na Conferencia Mundial da Asociación Internacional de Cidades e Portos celebrada a semana pasada en Nova York, a rexedora destacou que a súa participación foi “tremendamente produtiva para a cidade”.
“Foron xornadas de traballo intensas nas que aprendemos moito e vimos outros desenvolvementos”, explicou respecto dunha “aprendizaxe” para afrontar retos de “cara ao futuro do porto” da Coruña.
Entre eles, destacou compatibilizar usos portuarios, económicos, actividade pesqueira, transporte mercadorías, de viaxeiros e cruceiros, así como a posibilidade de xerar espazos de uso residencial nas zonas costeiras.
Máis novas
Presentadas 15 propostas para a redacción do Máster Plan de Coruña Marítima
