A Unidade de Policía Nacional Adscrita de Galicia detivo a unha persoa e identificou a outras seis por furtivismo, no marco de diversos dispositivos especiais de vixilancia desenvolvidos en colaboración co Servizo de Gardacostas de Galicia e a cofraría de pescadores da Coruña destinados á detección e persecución do furtivismo organizado na ría da Coruña. Nun comunicado explican que o detido tiña unha resolución xudicial de inhabilitación especial para o exercicio da caza e da pesca tras ser sorprendido en, polo menos, tres ocasións participando en actividades extractivas ilegais.

Impútanselle tres delitos de quebrantamento de condena e un delito contra a flora e a fauna pola súa participación directa na actividade extractiva ilegal. No que respecta aos seis identificados, foron investigados pola súa implicación directa na actividade furtiva, tanto na extracción como no apoio loxístico ao grupo. Se lles imputa un delito contra a flora e a fauna. Destacan que todos carecían de permisos de marisqueo e realizaban a actividade fóra das horas e períodos autorizados, ademais de incumprir as restricións relativas a tallas mínimas.

Apuntan tamén que para a extracción empregaban rasquetas metálicas, un instrumento que arrinca de maneira indiscriminada todos os exemplares adheridos á roca. Este método deixa a superficie completamente despoboada, destrúe o hábitat da fauna mariña asociada e provoca un impacto ambiental moi elevado. A investigación continúa aberta e non se descartan novas actuacións.