Levaban onte á Comisión 4ª de Educación e Cultural do Parlamento Galego o BNG a situación do CEIP Cidade Vella. Despois das mobilizacións das familias foi o BNG o que levou as demandas da ANPA ao pleno. Unha ANPA que estivo presente na Comisión, coa presenza de 4 pais e nais “escoitando as mentiras do goberno da Xunta”, aseguran ao saír.
Comezaba Mercedes Queixas alertando que a Xunta non responde as súas preguntas sobre o estado do centro dende o pasado mes de setembro.
Queixas lamentou que a Xunta non recoñeza o problema e non actúe.
Tomou a palabra o Director Xeral de Centros e Recursos Humanos, Jesús Manuel Álvarez Bértola, que xa comezou poñendo as responsabilidade no Concello da Coruña, considerando que a situación do centro é debida á falta de mantemento.
Se ben é certo que hai unha falta evidente de mantemento (a ANPA asegura que o Concello está respondendo actualmente ás demandas máis urxentes) a Xunta obvia a necesidade de afrontar unha gran obra de rehabilitación nun centro envellecido con serios danos estruturais, que sería de competencia autonómica, máis aínda tendo en conta que se trata dun edificio histórico protexido.
Máis indignación levantaron aínda as cifras “inventadas” polo responsable da Xunta, que asegurou ter investido 400.000€ en diferentes melloras neste colexio coruñés, entre elas a substitución da cuberta e parte da renovación das ventás do centro, esquecendo dicir que son investimentos de hai máis de 15 anos…
“Os balóns fóra xa non coman”, critican dende a ANPA.
Máis novas
As familias do CEIP Cidade Vella esixen na rúa con contundencia compromisos das administracións
