A alcaldesa da Coruña, Inés Rey, demandou á Xunta a creación dun consorcio metropolitano de transporte, tras as medidas de bonificacións anunciadas polo Goberno central. “Gustaríanos que no transporte metropolitano a Xunta tamén tomase medidas deste tipo”, aseverou a rexedora a preguntas dos xornalistas tras a Xunta de Goberno local.

Nas súas manifestacións, instou tamén á Administración galega a “atender a reivindicación que facemos desde anos de creación dun consorcio metropolitano de transporte, máis necesario que nunca cando o próximo ano entrará en funcionamento a estacion intermodal“, engadiu.

Mentres, cuestionada polas denuncias de falta de pagamentos de nóminas en instalacións deportivas, explicou que, a través da Concellaría de Deportes, “hai un diálogo permanente” coa concesionaria “para que pague os salarios”. “Estamos a facer todo o posible para que cobren, onte mesmo enviábase un requirimento a Serviplus, actuaremos con todos os medios para que cumpran coas súas obrigas laborais”, recalcou.