O portavoz do grupo municipal do PP no Concello da Coruña, Miguel Lorenzo, esixiu a dimisión da alcaldesa da Coruña, a socialista Inés Rey, e do portavoz do goberno local e concelleiro de Facenda, José Lage Tuñas, tras as denuncias de acoso laboral por parte de dúas exconcelleiras do seu mesmo partido. “Teñen que dimitir hoxe mesmo e senón fano ten que tomar unha posición o secretario xeral do PSdeG”, dixo nunha comparecencia ante os medios de comunicación en referencia a José Ramón Gómez Besteiro, ao que pediu que actúe neste caso como no do alcalde de Barbadás (Ourense), Xosé Valcárcel, ao que pediu que deixase a Alcaldía tras a denuncia por presunto acoso laboral.
Lorenzo insistiu en que a rexedora non ten que remitirse a un comunicado senón dar “explicacións” e considerou que a cidade non pode ter á fronte da Alcaldía a unha persoa “denunciada por acoso”. Ademais, instou ao BNG a exercer “as súas competencias” no caso de que a alcaldesa herculina e o portavoz local non presenten a dimisión para que “lles deixe de apoiar”, engadiu en relación ao acordo de investidura.
“FEITOS GRAVÍSIMOS”
De “feitos gravísimos” cualificou as denuncias efectuadas polas dúas exediles, das que, por outra banda, asegurou que era “un segredo a voces” a situación denunciada. Unhas denuncias ás que respondeu a través dun comunicado remitido aos medios a propia rexedora, que asegurou que se trata dun “axuste de contas” das exedilas por non repetir nas listas.
