O pleno da Coruña aprobou un orzamento de 375 millóns de euros para 2026, co respaldo de socialistas e nacionalistas — que asinaron este luns o acordo alcanzado sobre as contas — e denuncias de “inejecución” de partidas por parte do PP en relación a este ano e o exercicio anterior. Na sesión plenaria, o portavoz do goberno local, José Manuel Lage, destacou que as distintas partidas incluídas buscan “dar resposta” ás necesidades da cidadanía, tanto “globais como sectoriais”.
Así, destacou as actuacións nos barrios, en materia de mobilidade ou o reforzo de seguridade e emerxencia, asi como os “máis de 18,6 millóns de euros para diferentes actuacións en edificios públicos”.”Licitarase de novo o servizo de transporte urbano”, dixo nunha intervención con referencia tamén ás actuacións vinculadas á política en materia de vivenda; o investimento no Consorcio de Turismo ou o novo contrato do Servizo de Axuda no Fogar.
CRÍTICAS DO PPdeG
“Os ingresos non son reais, este orzamento nace con inestabilidade orzamentaria“, apostilou o portavoz do grupo municipal do PP no Concello da Coruña, Miguel Lorenzo, quen asegurou que desde que gobernan os socialistas “pedíronse 178 millóns de euros en créditos”. “Prometen pero non cumpren“, dixo noutra parte da súa intervención o representante popular. “Non chamaron ao PP para facer propostas”, reprochou tamén Lorenzo, ao que o portavoz do goberno municipal instou a facelas nunha resposta na que apelou á execución de proxectos.
APOIO DO BNG
Pola súa banda, o portavoz do grupo municipal do BNG, Francisco Jorquera, fixo unha defensa dos acordos alcanzados cos socialistas, considerando que houbo un cambio respecto deste ano en relación ao cumprimento agora de acordos de investidura. Xunto ás cuestións vinculadas á mobilidade e os orzamentos participativos, entre outras, aludiu aos vinculados á aplicación da lei de memoria democrática para retirar distincións a “persoas vinculadas ao Golpe do 36”.
A iso, sumou cuestións como solicitar a condonación da débeda do porto. “É un bo acordo”, dixo para cualificar, ademais, de “bos” os orzamentos.
Con todo, Jorquera tamén criticou a baixa execución dos orzamentos deste curso.
PSdeG e BNG ratifican o acordo dos orzamentos pensando no “benestar social”
