A alcaldesa da Coruña, a socialista Inés Rey, asistirá este sábado ao Comité Nacional do PSdeG, que se celebrará en Santiago de Compostela e que terá lugar tras a crise polas denuncias de acoso sexual a algúns membros do partido e de acoso laboral noutros, como é o seu caso.

En resposta aos xornalistas, ao ser preguntada por como ve ao PSdeG tras as denuncias e a situación xerada, manifestou que “o debate se dará alí, que é onde se ten que dar”. “Teremos ocasión de falar do proxecto do PSdeG para Galicia e do gran labor que se fai desde o municipalismo e as melloras que se conseguen cando goberna o PSdeG”.

Preguntada en concreto polas denuncias, insistiu en que este encontro do sábado será un momento para falar o que “desde o municipalismo estamos a facer para mellorar a vida da xente”. Mentres, cuestionada polo manifesto asinado por mulleres militantes do PSOE, pedindo facer autocrítica, asegurou que non tivo oportunidade de lelo aínda, pero insistiu en que o PSOE é un partido “que defende o feminismo” e que “traballa polos dereitos das mulleres e a igualdade”.

En relación a este asunto, a dirección federal do PSOE ten previsto convocar unha Conferencia de Igualdade, tal como reclamaron leste mesmo mércores un grupo de militantes socialistas que, ademais, pedían facer “autocrítica” polo que consideran unha fractura no movemento feminista.