Axentes da Comisaría de Policía Nacional da Coruña, adscritos ao Grupo de Investigación de Distrito Norte, detiveron a unha muller como presunta autora dun delito de furto, tras subtraer diversas xoias (aneis, pendentes, gargantillas) valoradas en 7.000 euros, dunha xoiaría situada na Ronda de Outeiro.

Os feitos tiveron lugar no mes de decembro de 2025 cando unha muller de idade avanzada entrou no devandito establecemento, coa escusa de adquirir varias xoias. Tras solicitar á empregada que lle amosase diferentes pezas, aproveitou un momento no que esta se ausentou do mostrador para introducir algunha delas no interior do seu peto, abandonando o establecemento sen realizar compra algunha.

Días máis tarde, volveu acudir á xoiaría e, aproveitando que foi atendida por outra persoa, repetiu o mesmo modus operandi, solicitando de novo a exhibición de varias xoias. En distintos momentos de distracción, subtraeu varias pezas, que introduciu no peto cando a empregada se afastaba do mostrador.

A principios do mes de xaneiro, a muller acode ao establecemento, sendo recoñecida sen ningún xénero de dúbidas pola empregada, quen alertou ao 091. Axentes uniformados, desprázanse ao lugar, procedendo á súa identificación e posterior detención como presunta autora e delito de furto. As investigacións posteriores permitiron comprobar que a detida vendera as xoias subtraídas nun establecemento de compravenda da cidade e recuperar parte das mesmas para facerlle entrega destas aos seus propietarios.