O primeiro Premio Nobel africano, Wole Soyinka, e a poetisa galega Lupe Gómez protagonizarán un recital o 26 de xaneiro na Coruña. Será no marco da décimo sétima edición do ciclo internacional de poesía ‘Poetas Di(n)versos’, organizado polo Concello herculino.

Segundo traslada o consistorio, celebrarase no centro Ágora ás 20.00 horas. “Por primeira vez en case dúas décadas de historia, participará neste evento un autor galardoado co Premio Nobel de Literatura“, recalca para apuntar que o nixeriano é “unha das grandes figuras vivas das letras universais”.

Este artista estará acompañado pola escritora Lupe Gómez, “autora fundamental da poesía contemporánea en lingua galega”, engade. ‘Poetas Di(n)versos’, iniciativa dirixida por Yolanda Castaño, mantén o seu formato habitual, con recitais mensuais entre outubro e xuño nos que “dialogan unha voz galega e outra internacional”.