A Garda Civil detivo a catro persoas como presuntas autoras de oito delitos de roubo con forza en estacións de servizo da provincia da Coruña. Segundo informou o Instituto Armado nun comunicado, a operación, bautizada como ‘Caxetins’, permitiu desmantelar unha banda que actuaba nas localidades de Arteixo, Abegondo, Sada e A Coruña. O montante dos roubos ascende a 900 euros pero causaron danos por valor de 1.900.

A operación comezou tras detectarse diversos roubos cun patrón idéntico consistente en forzar os caxetíns de moedas nos boxes de lavado de vehículos. A coordinación entre o Posto Principal de Arteixo e as unidades de Sada e Abegondo xunto coa colaboración do Corpo Nacional de Policía permitiu centralizar as pescudas ante a sospeita de que se trataba dun grupo organizado de carácter itinerante.

Desta forma, os investigadores detectaron un nexo común mediante a utilización en todos os asaltos dun mesmo vehículo de cor azul escuro. Este elemento resultou determinante para lograr a identificación plena de catro homes con amplos antecedentes delituosos quen actuaban de forma coordinada para violentar os sistemas de almacenamento de efectivo.

O operativo para as detencións desenvolveuse de forma graduada durante o mes de xaneiro comezando o día 22 coa intercepción dun dos autores mentres circulaba pola autovía A-6. Posteriormente, o día 26 de xaneiro os axentes da Garda Civil localizaron e detiveron a outros integrantes do grupo nun inmoble ocupado da cidade da Coruña, finalizando o servizo esa mesma tarde coa detención do último implicado.

Esta operación permitiu esclarecer asaltos en diversas estacións de servizo das zonas da Coruña, Meicende, Abegondo e Sada. O botín total ascende a 900 euros en efectivo e os danos estruturais provocados nas instalacións afectadas superan os 1.900 euros.