Un funcionario do centro penintenciario de Teixeiro, na Coruña, resultou ferido de gravidade este xoves mentres intentaba separar a dous internos que protagonizaban unha pelexa. Segundo informaron fontes sindicais, durante a intervención un dos reclusos golpeou ao empregado de prisións, provocándolle unha fractura de morna en varios puntos. O incidente tivo lugar nun dos módulos destinados a internos en segundo grao, poñendo de novo o foco sobre a seguridade e a falta de recursos no centro.

Desde o sindicato Tu Abandono Me Puede Matar (TAMPM) alertaron sobre o perfil cada vez “máis violento” de certos reclusos e denunciaron un incremento do 25% na poboación recluída en Teixeiro, factor que, segundo indican, está detrás do aumento das agresións. Así mesmo, criticaron o que definen como “buenismo” na xestión penitenciaria actual e esixiron medidas urxentes para protexer aos traballadores ante situacións de risco extremo como a vivida este xoves.

Pola súa banda, o sindicato Acaip sinalou que a prisión se enfronta a “tempos difíciles” debido ao progresivo envellecemento do persoal. Aínda que nos últimos anos se recuperaron algúns efectivos, o groso dos traballadores de Teixeiro está en idade de xubilación ou próximo a pasar á segunda actividade. As centrais sindicais advirten de que os mecanismos para cubrir estas vacantes son excesivamente lentos e que o proceso de rexuvenecemento do persoal aínda tardará anos en completarse, deixando o centro nunha situación de vulnerabilidade.