A alcaldesa da A Coruña, Inés Rey, reivindicou que a implantación da taxa turística, vixente desde o 29 de setembro, non só non reduciu o número de visitantes, senón que coincidiu cun incremento das pernoctacións na cidade. “Non disuade, senón que aumentamos”, asegurou tras a constitución da comisión de seguimento da taxa, presidida polo portavoz do goberno local, José Manuel Lage, e da que forman parte técnicos das áreas de Economía e Turismo, representantes do Consorcio de Turismo, da Autoridade Portuaria e de Hospeco, a patronal hostaleira.
A rexedora reiterou que o obxectivo da taxa é “afrontar o custo dos servizos que se prestan aos visitantes” e evitar que ese gasto recaia sobre os petos da veciñanza. A taxa aplícase tanto a establecementos hoteleiros como a vivendas turísticas, cun importe que vai dun euro a 2,50 euros por noite. Unha vez pechado o primeiro trimestre de aplicación, Rey detallou que a recadación xa alcanza os 407.000 euros, aínda que o Concello prevé chegar ao medio millón de euros cando remate o proceso de liquidación. Segundo explicou, 25 establecementos hoteleiros xa abonaron a taxa e outros seis están a piques de facelo.
A alcaldesa advertiu, con todo, de que existe “menos colaboración por parte das vivendas turísticas”, un sector que, segundo denunciou, non está a cumprir nin coa taxa nin coa normativa de regularización. “Haberá un plan de inspección”, avanzou. Rey apoiou a súa defensa da taxa nos datos oficiais do Instituto Nacional de Estatística, que reflicten que as pernoctacións na Coruña en 2025 medraron máis dun 14 % respecto a 2024, mentres descenden noutras cidades galegas como Santiago ou Vigo.
“Non só somos a cidade galega que máis sobe en pernoctacións, senón que ese crecemento prodúcese tamén entre setembro e decembro, xusto no trimestre no que comezou a aplicarse a taxa”, subliñou. Ademais, anunciou a creación dun selo informativo específico para explicar á cidadanía e aos visitantes o destino dos fondos recadados. En relación coa posible taxa aos cruceiristas, a alcaldesa asegurou que o goberno municipal cumprirá a normativa da Xunta de Galicia. “Foi o PP quen estableceu esta taxa na lei de acompañamento orzamentario; iso corresponde á Xunta”, concluíu.
