A Universidade da Coruña (UDC), a través do Grupo de Investigación en Xerontoloxía e Xeriatría, levará a cabo un estudo piloto para analizar os efectos dunha bebida funcional, Seadrinks, elaborada con auga do mar depurada das Illas Cíes, no envellecemento activo de persoas maiores de 60 anos. A investigación está dirixida polo catedrático de Medicina José Carlos Millán e conta coa aprobación do comité de ética de investigación A Coruña-Ferrol, requisito imprescindible para o desenvolvemento deste tipo de ensaios.

O proxecto terá unha duración de oito semanas, período no que as persoas participantes consumirán diariamente un litro da bebida asignada, ben sexa a elaborada con auga do mar ou un placebo, dentro dun deseño controlado. Durante o estudo realizarase unha avaliación inicial e outra final, ademais dun seguimento semanal por parte de profesionais das áreas médica, psicolóxica, de enfermaría e terapia ocupacional, co obxectivo de analizar posibles cambios no benestar e na funcionalidade das persoas participantes. Desde o equipo investigador lembran que as persoas interesadas en participar poden contactar directamente cos responsables do proxecto para obter máis información sobre os requisitos e o proceso de selección.