Segue afiandánzose a Romaría de San Blas de Veiga, o Entroido da Veiga, como un dos epicentros do entroido comarcal. Este luns congregou a numeroso público que gozou da creatividade e o humor dos concursantes. Nin choiva, nin vento: nada detivo aos choqueiros, que se apoderaron de Veiga para celebrar a festa máis xenuína do Entroido de Culleredo.

As celebracións carnavalescas desatáronse ao mediodía, despois da misa, cos acordes da orquestra Fania Blanco Show. A pesar de que a choiva non deu tregua, as ganas de festa e unha carpa fixeron que boa parte dos asistentes se esquecesen da auga.

Desfilaron soldaditos de xoguete e pinturas de cera, entre outros, pero a vencedora do concurso foi unha comparsa de galiñas confinadas. Unha señora montada nun singular carriño da compra mereceu o segundo premio a ollos do xurado, mentres que o podio completouno unha Estatua da Liberdade que portaba unha baliza V16.

Antes de dar paso á comida popular- con entradas esgotadas -, chegou a sátira. A Comisión de San Blas pasou revista á actualidade coa lectura do Testamento, unha serie de coplas humorísticas que espertaron as gargalladas do público.

Máis entroido

A programación carnavalesca do Concello de Culleredo continuará este martes con animación infantil e obradoiros nos centros O Noso Lar de Tarrío, o Centro Cívico de Sésamo e o Centro Social Ledoñés. Seguiralles o Centro Cívico Castelo este mércores. As actividades comezarán ás 17:00 horas.

Ademais, o mércores organizarase o obradoiro infantil “Entroido espacial” na biblioteca Miguel González Garcés. A axenda festiva continuará ata o sábado, co Entroido no Centro Cívico de Almeiras.