Fiscalía mantivo a súa petición de nove anos de cárcere para un home acusado dun delito de agresión sexual a unha muller en setembro de 2021, no piso no que ambos convivían na Coruña. Pola súa banda, a acusación particular elevou a solicitude de pena a dez anos, mentres que a defensa reclamou a absolución do procesado na última sesión do xuízo celebrada na Audiencia Provincial.

Durante a vista oral declararon o acusado —que negou os feitos— e a vítima —que se ratificou na súa denuncia—, así como dúas testemuñas. Unha delas, parella do home, asegurou que ese día mantiveran relacións sexuais e que o preservativo utilizado quedara no baño, argumento empregado pola defensa para soster a hipótese dunha posible transferencia indirecta de restos de seme atopados na denunciante.

Segundo testificaron axentes da Policía Nacional, estes restos eran compatibles cos do acusado. Non obstante, a xinecóloga que atendeu á muller explicou que non se pode confirmar nin descartar esa transferencia indirecta, aínda que indicou que a denunciante relatara que non houbo penetración, algo que —precisou— non impide a presenza de seme por contacto ou por saída previa de líquido seminal. A parella sentimental da vítima naquel momento afirmou que ela lle chamou pedindo axuda e que tardou varios días en contarlle o sucedido, explicándolle que o acusado tivo “intención de penetrala, pero non do todo”.

Segundo a versión do Ministerio Público, os feitos terían lugar no domicilio que ambos compartían na cidade herculina. Pola súa banda, o acusado reiterou ante o tribunal que “non houbo tocamentos, non houbo relación sexual, non houbo nada”, e describiu á moza como “unha irmá pequena”, xa que fora acollida na súa casa por petición das familias, amigas entre si. Na súa declaración, tamén sostivo que o día dos feitos estaba lesionado e necesitaba axuda practicamente para todo, argumento que a defensa emprega para cuestionar a acusación.