As negociacións polo convenio do transporte de viaxeiros por estrada na provincia da Coruña volveron finalizar sen acordo, segundo confirmou CCOO tras a reunión celebrada este venres.
Foi coa firma da acta final na que se recolle que a mediación, no Consello Galego de Relacións Laborais, acaba sen o citado acordo, o que supón un formalismo dentro dun proceso no que non houbo achegamento de posturas entre sindicatos e patronal.
A cousa vén de lonxe e os que pagan os problemas volven a ser os usuarios, que non saben se vai haber ou non servizo.
Tras uns paros intermitentes, con amplo seguimento e con unión sindical por parte do tres organizacións representadas — CIG, UXT e CCOO — pasouse á división sindical despois de que asinasen un preacordo CCOO e UXT, con melloras laborais e sindicais, segundo ambas as centrais, pero insuficientes para a central nacionalista.
Este preacordo non contou co respaldo maioritario dos traballadores e traballadoras. Neste contexto, a CIG optou por convocar unha folga indefinida. CCOO pediu á patronal que aclarase algúns aspectos do preacordo pero sen que, finalmente, asinásese nada por parte deste sindicato.
UXT optou por un acordo de eficacia limitada o que implica que cada traballador ou traballadora deberá decidir se o asina ou non. A CIG expuxo no seu momento reiniciar a negociación en conxunto con CCOO sen contestación, segundo a central nacionalista, por parte deste sindicato.
Desde este último precisaron a Europa Press que hoxe se asinou a acta final sen acordo polo que “segue vixente o actual convenio e as persoas traballadoras que así o decidan poden acollerse ao convenio de eficacia limitada que pactou UXT coa patronal”.
A CIG DENUNCIA “MALA FE” E DUBIDOSA LEGALIDADE
Pola súa banda, a CIG estuda impugnar o acordo entre UXT e a patronal sobre este convenio de eficacia limitada. Nun comunicado, a central nacionalista afirma que o encontro desta xornada serviu “para confirmar o atentado á liberdade sindical perpetrado pola patronal e UXT“, ao asinar o pacto co proceso de negociación aínda activo. Segundo apostilan, UXT xa comezou a distribuír o documento de adhesión individual entre o persoal.
Para a CIG, este tipo de actuación “constitúe un acto de mala fe” por non respectar o rexeitamento maioritario dos cadros de persoal ao preacordo inicial. Tamén lamenta que CCOO non atendese ao seu chamamento para facer “unha fronte común” na negociación. O vindeiro luns, o sindicato nacionalista convocou asembleas cos traballadores e avanza que estuda a impugnación pola súa “dubidosa legalidade”.
Máis novas do proceso
UXT asina un convenio de eficacia limitada para transporte de viaxeiros na Coruña
