Unha cría de balea aliblanca foi localizada este domingo na praia de Santa Cristina, no concello de Oleiros, tras quedar varada na beira do mar. O exemplar, duns tres metros de lonxitude, presentaba signos evidentes de desnutrición e tiña un cravo incrustado na boca, segundo confirmaron os servizos desprazados ao lugar.

O aviso produciuse arredor das 13:00, cando un particular contactou co 112 Galicia para informar da presenza dun cetáceo na area. Na chamada indicouse que non se podía determinar con claridade se se trataba dun golfiño ou dunha balea. A central de emerxencias mobilizou á Coordinadora para o Estudo dos Mamíferos Mariños (Cemma), así como á Policía Local e aos efectivos de Emerxencias de Oleiros.

Segundo trasladaron fontes do operativo, o animal fora visto xa sobre as 12:00, momento no que varias persoas presentes na praia intentaron, sen éxito, devolvelo ao mar. A cría regresaba reiteradamente á beira, sen capacidade para manterse en augas máis profundas.

Unha vez no areal, o equipo da Cemma confirmou que se trataba dunha balea aliblanca nova e avaliou o seu estado físico. De acordo co informe veterinario, o exemplar atopábase “moi delgado e canso” e non presentaba opcións de recuperación. Ante esta situación, o persoal especializado decidiu practicar a eutanasia ao considerar que “non tiña a máis mínima posibilidade de sobrevivir”.

Os servizos actuantes permaneceron na zona durante varias horas para coordinar as tarefas posteriores á intervención. O suceso congregou a numerosos curiosos nunha xornada dominical de elevada afluencia no areal oleirense.