O alcalde do municipio coruñés de Oleiros, Ángel García Seoane, de Alternativa dos Veciños, puxo en marcha unha campaña contra o presidente de Estados Unidos, Donald Trump, a través dos paneis informativos existentes na zona. Trátase, apuntan fontes do goberno local, dunha campaña de denuncia “da situación internacional que hai nestes momentos” ante os ataques de Estados Unidos e Israel contra Irán.
Os nove paneis luminosos do municipio, utilizados normalmente para informar sobre actividades locais, están a usarse nesta ocasión para divulgar unha imaxe da cabeza de Donald Trump sobre un corpo de xabaril. A imaxe vai acompañada da frase ‘Ábrese a veda’, facendo un paralelismo coas campañas de caza de xabarís autorizadas pola administración.
A iniciativa ten como obxectivo amosar o rexeitamento á guerra impulsada por Estados Unidos e ás actuacións de Donald Trump. Non é a primeira vez que o consistorio promove este tipo de accións, pois xa realizou anteriormente campañas en apoio ao pobo palestino, entre outras causas internacionais. Esta nova intervención consolida a liña de posicionamento político que o rexedor de Oleiros vén mantendo sobre o escenario xeopolítico actual.
