Emoción a flor de pel a vivida onte no salón de actos da Casa Sindical da CGT da Coruña. Máis dun cento de persoas asistiron a un faladoiro con mulleres vítimas do Patronato de Protección de la Mujer”, institución franquista de represión para nenas e mulleres de todo o estado dende a súa creación 1941 ata o ano 1985, xa superada transición democrática.

Organizados pola CGT da Coruña e o Ateneo Aurora, o barrio do Agra do Orzán acolleu dous actos en lembranza das nenas e mulleres vítimas do Patronato. Unha institución tiña no vello convento das Adoratrices da rúa Gregorio Hernández un dos seus centros correccionais. Alí foi colocada unha placa simbólica en memoria das nenas e mulleres que sufriron malos tratos, abusos e opresión nos centros do Patronato, coa presencia dun grupo de mulleres vítimas desta institución.

De seguido, nun ateigado salón de actos da Casa Sindical, falaron tres das vítimas do Patronato. O acto comezou coa intervención da investigadora Belén López Cillero que fixo unha introdución histórica da institución e o seu actuar ao longo do franquismo e ata os anos 80 do século pasado.

As testemuñas de Loli G. Benito, Paca Blanco Díaz e Consuelo García del Cid fixeron emocionado relato do seu sufrimento en diferentes centros do Patronato no estado español e da súa loita pola recuperación pública da memoria e da reparación precisa ás vítimas desta ferramenta de represión do réxime franquista e máis aló da súa suposta desaparición.