A Policía Local de Culleredo detivo a un home por roubar pertenzas do interior de furgóns industriais. Os feitos tiveron lugar na madrugada do xoves na zona de Acea de Ama.

Sobre as 1.40 horas, un veciño da urbanización Tenro Galván, alertou ás forzas de seguridade sobre a presenza dunha persoa retirando obxectos dun vehículo estacionado na devandita rúa.

Ao lugar, desprazouse ata ese punto unha dotación da Policía Local, sorprendendo a un home con vestimenta escura e carapucha a piques de subirse a un turismo estacionado a escasos metros do referido polo veciño no seu aviso.

Ao verse localizado comeza unha fuxida a pé do lugar sendo perseguido polos axentes, que finalmente o deteñen. Ao arrestado interviñéronselle diversas pertenzas procedentes de dous furgóns industriais, tal e como se verificou cos seus propietarios.

O material subtraído componse principalmente de ferramentas de traballo, destacando dous maletíns completos. O detido é un home de 45 anos, natural da Coruña.