Realizábanse onte nos institutos de secundaria do país as probas diagnósticas para medir nivel dos centros, para medir o estado de saúde do ensino público galego. Unha avaliación anónima, que se fai a través de probas ao alumnado 2º da ESO nos IES, e de 4º de Primaria nos CEIP (que se realizarán a semana que vén).
Pois o colapso acontecido onte nas plataformas dixitais provocou que os centros perdesen media mañá de onte e teñan que estar hoxe tamén realizando as probas.
Dende as ANPAS Galegas e da CIG denuncian a “chapuza total” dun sistema que, por primeiro ano, realiza estas medicións a través de plataformas dixitais, que ademais son privadas.
Dende as ANPAS Galegas denuncian ”a falta de previsión por parte da Consellería de Educación, Ciencia, Universidades e Formación Profesional”. “Houbo problemas coas actualizacións, a plataforma funcionou con moita lentitude, tiveron problemas coa conexión, conectábase e desconectábase e nalgúns casos, sen asistencia técnica”.
Probas de diagnóstico
Estas probas de diagnóstico das competencias adquiridas polo alumnado son obrigatorias para todos os centros de ensino e teñen carácter formativo, informativo e orientador e co obxectivo da mellora do sistema educativo e realízanse para os cursos 4º de educación primaria e 2º de educación secundaria.
En primaria avaliarán a competencia matemática, as competencias en comunicación lingüística en Lingua Galega e Literatura, en Lingua Castelá e Literatura e en Lingua estranxeira: Francés e Inglés, e os obxectivos das áreas de Ciencias Sociais e Ciencias Naturais.
En educación secundaria obrigatoria avaliaranse a competencia matemática, as competencias en comunicación lingüística en Lingua Castelá e Literatura, en Lingua Estranxeira: Alemán, Francés e Inglés e os obxectivos das materias de Xeografía e Historia, Física e Química e Bioloxía e Xeoloxía.
Dende as ANPAS entenden que “a avaliación do sistema educativo ademais de ser de obrigado cumprimento é necesaria para a mellora educativa por iso é preciso que se poñan todos os medios dispoñibles para que a realización destas probas se leve a cabo sen contratempos”. “A realización destas probas estaba prevista e non pode haber lugar á improvisación como aconteceu no día de hoxe coas probas a 2º de secundaria e agardamos que nas de primaria teñan resoltas todas as eivas e se poidan realizar con normalidade”, tendo en conta ademais que o alumnado de 4º de Primaria non ten o programa edixgal polo que non está familiarizado a traballar en entornos dixitais.
Pola súa parte, a CIG-Ensino xa o advertira: “o caos nas avaliacións de diagnóstico era previsible”, sinalan, entendendo que se ían realizar “sen instrucións claras, sen información suficiente e sen garantías sobre a súa aplicación podía derivar nun auténtico caos organizativo”.
