Persoal da refinaría de Repsol na Coruña mobilizouse este martes para denunciar “recorte” de persoal na unidade de coque. Unha decisión que, sosteñen desde a CIG, supón “un paso máis na política de destrución de emprego“. “E de falta de investimentos de Repsol neste complexo industrial”, engade nun comunicado no que argumenta que “baixo o eufemismo de modificación de estrutura redúcese o cadro de persoal”.
A representación sindical argumenta que se fai “sen achegar información nin documentación que xustifique este recorte nin tampouco explica como se organizará o traballo nesta unidade cunha persoa menos por quenda, tendo en conta as operacións críticas que se fan en coque”. “Necesítanse un mínimo de catro persoas operadoras para executar determinadas actividades con garantías“, apostila para aseverar que non saben “como pretende a dirección executar este tipo de manobras co cadro de persoal reducido”.
