A sección segunda da Audiencia Provincial da Coruña condenou a un home a 15 anos de cárcere como autor de delitos contra a liberdade sexual da súa filla. Ademais, tal e como se recolle na sentenza, imponlle a prohibición de aproximar e de comunicar coa vítima durante 21 anos, así como 16 anos de liberdade vixiada e a inhabilitación para o exercicio de calquera profesión ou oficio, sexa ou non retribuido, que leve contacto regular e directo con menores durante 9 anos. Tamén deberá indemnizar á vítima, en concepto de dano moral, con 30.000 euros.

Nos feitos probados da sentenza, o tribunal destaca que o procesado, en diversas ocasións e en diferentes domicilios, realizou tocamentos e violou á súa filla, que denunciou os feitos. Así, a sala, tras valorar as probas e testemuños, conclúe que o relato da vítima é “sincero, crible, consistente e persistente”, polo que rexeita as alegacións da defensa. A iso, engade que “tampouco cabe apreciar nin a existencia de contradición algunha relevante nin a presenza de ningún móbil de vinganza contra o procesado”.

“A experiencia, por desgraza, demostra que nos delitos contra a liberdade sexual no ámbito das relacións familiares o seu autor aproveita tanto os momentos en que se atopa a soas coa vítima, o que lle depara unha maior facilidade comisiva, como a ausencia de desconfianza (relaxación dos mecanismos de alerta) cara á súa persoa por parte dos seus familiares próximos para levar a cabo as súas condutas sen levantar sospeitas sobre o seu comportamento“, apuntan os maxistrados.

En definitiva, o tribunal considera acreditada, máis aló de toda dúbida razoable, o que permite ter por desvirtuada a presunción de inocencia, a comisión dos feitos por parte do procesado. A sentenza pode ser recorrida ante o Tribunal Superior de Xustiza de Galicia (TSXG).