A irmá dos dous acusados por, presuntamente, quedar cunha primitiva millonaria na Coruña en 2012 — feitos que se xulgan na Audiencia coruñesa 14 anos despois — rexeitou que os seus irmáns — uno loteiro nesta cidade e outro entón delegado provincial de Lotarías — urdiesen un plan para quedar co boleto premiado.
“Ningún dos dous teñen mente conspiranoica“, aseverou durante a súa declaración como testemuña. “O meu irmán Manuel non tería collóns de facer semellante cousa“, dixo noutro momento e en relación á acusación de que este ocultaría ao verdadeiro dono do boleto que estaba premiado para dicir logo que o atopou no seu despacho e poder reclamar o importe, como sosteñen Fiscalía e acusacións particulares.
E é que a cuarta sesión, previa á declaración dos dous acusados prevista para o luns, día 20, centrouse na declaración de policías que se encargaron de solicitar pegadas para ver se era posible determinar quen era o dono; exresponsables de Lotarías e Apostas do Estado, para concretar que procedemento se sigue en casos así, e a filla dunha das persoas que o reclamou e que a Policía considerou que non era o lexítimo dono.
Esta parte e outra familia, a viúva e a filla dun home que a investigación policial si considerou o verdadeiro propietario, exercen a acusación particular nunha vista con senllas defensas por cada un dos acusados, xunto á aseguradora personada e a Avogacía do Estado. A eles, súmase Fiscalía que solicita para o primeiro seis anos de cárcere por un delito de estafa ou, alternativamente, por apropiación indebida. Para o seu irmán, o exdelegado provincial de Lotarías, pide a mesma pena de prisión por branqueo de capitais ou por encubrimento.
RECLAMACIÓN
A filla do home que a Policía nunca considerou o verdadeiro dono, ao descartar que houbese as súas pegadas no boleto, manifestou que fixeron a reclamación na delegación de Lotarías, na que traballa a familia Reija ao ter un contrato mercantil coa Sociedade Estatal de Lotarías e Apostas do Estado (SELAE).
Tamén especificou que Miguel Reija, exdelegado provincial de Lotarías e acusado xunto ao seu irmán Manuel Reija, o loteiro, aseguroulle que xa se cobrou e que o boleto estaba nunha caixa forte en Lotarías do Estado. “O meu pai dixo que se estaban quedando con el”, apuntou sobre a primitiva premiada.
Antes prestou declaración a irmá dos dous procesados — Miguel Reija hoxe non compareceu por prescrición médica — para rexeitar que houbese unha actuación ilícita por parte dos seus irmáns. Así, explicou que Manuel se achegou á delegación de Lotarías, onde ela traballaba como administrativa, con rostro preocupado e que explicou que se atopou cun grupo de boletos e que para a súa “sorpresa” un tiña premio.
Tamén aseverou que lle preguntou ao seu irmán Miguel o que debía de facer e que este lle dixo que volvese ao despacho por se había reclamacións. Respecto diso, o Ministerio Público insistiu nas súas preguntas se non existía obrigación de enviar directamente á SELAE o boleto premiado.
ORIXE DO CASO
O caso ten a súa orixe nun dos episodios máis lembrados sobre o cobro de premios de Lotaría: o dun boleto agraciado con 4,7 millóns de euros que o loteiro dixo atoparse e que, durante anos, tivo unha propiedade discutida.
