O Concello da Coruña presentou este luns a Oficina Municipal de Vivenda, orientada a mellorar o acceso á vivenda e ofrecer asesoramento directo e gratuíto á cidadanía. Sobre o mesmo, a alcaldesa, Inés Rey, destacou a importancia do servizo, especialmente para as persoas arrendatarias. O espazo, situado no Paseo de Rolda, 32, presta atención de luns a venres en horario de mañá, de 09:00 a 14:00 horas, tanto de maneira presencial como telefónica.

A través deste servizo, a cidadanía pode resolver dúbidas sobre contratos de aluguer, actualización de rendas, dereitos e obrigacións, así como acceder a información sobre a normativa vixente. Na actualidade, a Oficina de Vivenda atende unha media de catro consultas diarias, o que supón ao redor de 20 semanais. “Tres de cada catro consultas teñen que ver coa zona de mercado residencial tensionado“, aseverou a rexedora, Inés Rey.

Sobre o servizo, indicou que facilita “información fiable” e que garante que a cidadanía “dispoña dun asesoramento gratuíto en materia de vivenda”, sinalou nun acto acompañada polo concelleiro de Urbanismo, Rehabilitación e Vivenda, Francisco Díaz.