Os delegados de CSIF no comité de empresa de Compostelá S.A. (Grupo Alsa) denunciaron a “falta de planificación” na nova cabeceira de autobuses da Coruña, concretamente na localización dos servizos interurbanos na contorna do Teatro Colón. O sindicato cuestiona a postura da rexedora, Inés Rey, e rexeita que a coordinación do servizo poida resolverse simplemente graduando as chegadas para que os vehículos non coincidan.

A organización sindical considera inviables as previsións municipais que expoñen unha frecuencia de paso de aproximadamente tres minutos. “Os tempos de chegada e saída non dependen unicamente dunha planificación teórica, senón de múltiples factores diarios e imprevisibles”, sinalan. Entre estes factores, destacan a intensidade do tráfico rodado, o tránsito de peóns e bicicletas, así como as posibles obras ou retencións nos accesos ao centro urbano.

Dende o sindicato sosteñen que non se pode simplificar o funcionamento dunha cabeceira interurbana con “cálculos teóricos afastados da realidade diaria”. Segundo denuncian, tanto os condutores como os viaxeiros están a ser os principais prexudicados por decisións adoptadas sen o rigor técnico necesario para garantir a fluidez do transporte público.

Para CSIF, a escaseza de espazo e a ausencia de coordinación están a converter unha medida anunciada como unha mellora nunha “fonte de problemas diarios”. O sindicato insta ao Executivo local a revisar a organización desta cabeceira para evitar que a falta de previsión acabe colapsando o servizo na zona do Teatro Colón.