A Garda Civil, a través de efectivos do Equipo Territorial de Policía Xudicial de Ferrol e co apoio do Posto de Fene, desarticulou a un grupo criminal especializado en roubos en establecementos de hostalaría na provincia da Coruña.

Segundo explican nun comunicado, no marco da explotación da Operación Yellowfene, detívose a tres persoas como presuntos autores de polo menos nove delitos de roubo con forza nas cousas e un delito de pertenza a grupo criminal. A investigación iniciouse tras detectarse unha serie de ilícitos penais “que xeraran unha notable alarma social en diversas localidades da provincia”.

O grupo criminal centraba a súa actividade en establecementos de hostalaría, aos que accedían empregando a forza unha vez que os locais finalizaran o seu horario de apertura ao público. Os roubos concentráronse nos termos municipais de Valdoviño, San Sadurniño, Fene, Cabanas, Miño e Cambre. Durante o desenvolvemento da investigación, os axentes puideron determinar a alta especialización dos implicados, cuxos danos materiais efectuados nos establecementos para consumar os roubos estímanse por encima dos 100.000 euros.

Destacan que o grupo quedou totalmente desarticulado e que os detidos, xunto ás dilixencias instruídas, pasaron a disposición xudicial. Tras prestar declaración, o Tribunal de Instancia decretou o ingreso en prisión para un dos implicados, mentres que os outros dous quedaron en liberdade con cargos á espera de xuízo.