Hai pouco cumpliron 20 anos en Galicia, pero en realidade as entidades que formamos parte do movemento polo Comercio Xusto no Estado español celebramos catro décadas de traballo conxunto promovendo un modelo comercial baseado na equidade, a sustentabilidade e o respecto aos dereitos humanos e ao medio ambiente.
Así o resalta a entidade Solidariedade Internacional Galicia, que quere celebrerar os “40 anos de Comercio xusto: Un modelo que transforma o mundo”. A entidade celebra o Día Mundial do Comercio Xusto, que se celebrará hoxe 9 de maio, con diferentes accións nas súas tendas e canles de comunicación ao longo de toda a semana, co obxectivo de achegar á cidadanía as historias que hai detrás de cada produto e poñer en valor o impacto das decisións de consumo.
“O Comercio Xusto garante condicións laborais dignas, salarios xustos e prezos estables para as persoas produtoras, ademais de promover a igualdade de xénero, a loita contra a explotación infantil e o respecto polo medio ambiente. Cada produto é unha ferramenta de cambio que conecta o consumo diario co impacto global”.
O movemento de Comercio Xusto, articulado a través da Coordinadora Estatal de Comercio Xusto, consolidouse como un modelo solidario alternativo recoñecido pola recente Lei Integral da Economía Social. Desde a apertura da primeira tenda especializada en 1986, a rede conta hoxe con decenas de tendas e puntos de venda en todo o Estado, traballando con organizacións produtoras de América Latina, África e Asia.
Ademais, nos últimos anos, o Comercio Xusto tamén está a impulsar cambios nas cadeas de produción locais, promovendo condicións máis xustas tamén no ámbito estatal.
Paralelamente, as organizacións de Comercio Xusto desenvolven un importante labor de sensibilización social, especialmente a través do traballo en centros educativos e campañas de consumo responsable, contribuíndo a formar unha cidadanía crítica e comprometida.
O Consumo, o noso meirande voto
O Día Mundial do Comercio Xusto celébrase cada ano co obxectivo de reivindicar un modelo económico máis xusto e sostible, lembrando que a través das nosas eleccións de compra tamén podemos contribuír á transformación social.
Solidariedade Internacional celebrou 20 anos da tenda de comercio xusto de San Andrés
A Rede Acampa pola Paz, obrigada a disolver a súa actividade en Galicia
