A Xunta publicará este venres na Plataforma de Contratos Públicos de Galicia, por procedemento de urxencia, a licitación da concesión da nova estación de autobuses da Coruña, tras non conseguirse un acordo co Concello sobre unha solución definitiva ou provisional que permita a apertura e posta a disposición da cidadanía.
O convenio asinado en xuño de 2021 entre Xunta, Concello, Ministerio de Transportes e Adif para levar a cabo a estación intermodal recollía a posibilidade de que o Concello, que ten atribuída a explotación da actual estación de autobuses, continuase coa xestión da nova terminal situada na área intermodal da Coruña-San Cristovo.
Nesta liña, o Goberno galego leva meses en conversacións respecto da xestión da infraestrutura, pero para evitar que a situación se dilate no tempo, a Dirección Xeral de Mobilidade publicará a concesión da nova estación.
A Xunta terminou en prazo a finais do ano pasado a parte da obra da estación intermodal que lle correspondía executar, isto é, a nova estación de autobuses, o aparcadoiro de vehículos e os elementos comúns entre a estación de autobuses e a estación ferroviaria, cuxa remodelación lle corresponde a Adif.
Esta obra responde á estratexia de creación da área intermodal da Coruña-San Cristovo, concibida para integrar nun único espazo os distintos modos de transporte e mellorar a conectividade e a mobilidade da cidadanía.
Por tanto, a nova estación de autobuses da Coruña atópase plenamente terminada e dispoñible para a súa posta en funcionamento desde o primeiro trimestre deste ano. Por iso, a Xunta insta á necesidade da apertura, xa que considera que prolongar a situación actual é incompatible cunha utilización eficiente dos recursos públicos tendo en conta o importante investimento realizado para a súa execución, así como os custos de conservación e mantemento desta infraestrutura.
A Xunta investiu máis de 20 millóns de euros na nova estación de autobuses integrada na estación intermodal da Coruña-San Cristovo, no marco do convenio de colaboración entre o Goberno galego, Adif e o Concello, que mobiliza un investimento global de máis de 45 millóns de euros.
Esta infraestrutura enmárcase no Plan de Recuperación, Transformación e Resiliencia, financiado pola Unión Europea, a través dos fondos Next Generation EU.
