A Garda Civil investiga a suposta agresión ao director do IES Neira Vilas, situado no concello coruñés de Oleiros, por parte dun familiar dun alumno. Ambos presentaron denuncia, segundo confirmaron a Europa Press fontes da Benemérita.

Os feitos, apuntaron, tiveron lugar o pasado venres. “Temos unha denuncia presentada polo familiar do alumno o venres e outra polo director, que a puxo o luns“, detallaron. “Estánselles tomando declaración ás testemuñas”, engadiron sobre o caso.

Pola súa banda, desde a Xunta rexeitaron “calquera tipo de comportamento violento nos centros educativos”. “Reiteramos o firme compromiso de preservar o bo clima nas aulas, que é unha prioridade de Goberno”, recalcaron.  Neste sentido, lembraron que “tal e como avalan os datos das últimas enquisas realizadas, os centros educativos galegos son lugares seguros e eficaces”. “Mentres exista un só caso, debemos actuar con contundencia”, engadiron.

Por iso, insistiron en que a comunidade educativa “conta cun amplo abano de medidas ao respecto, como o Plan integral contra o acoso escolar, a instalación de puntos laranxa, a prohibición do uso dos móbiles, a constitución da Rede de concellos contra o acoso ou a formación específica para o profesorado, entre outras”. Con todo, avanzaron que o Goberno autonómico “vai reforzar aínda máis este ámbito cun novo paquete de accións para seguir fortalecendo o clima de respecto, responsabilidade e convivencia nas aulas dun xeito integral, como condicións indispensables para ensinar e aprender”.

Entre elas, destacaron que se inclúe a “intensificación das sancións para o alumnado que cometa faltas de carácter moi grave como o acoso e o ciberacoso; e tamén se tipificarán, por vez primeira, as agresións aos docentes, unha medida pioneira en toda España”.  Así, sinalaron que estas novas medidas se materializarán na Lei de acompañamento aos Orzamentos de 2027, a través da cal se actualizará a normativa vixente, como son a Lei e o Decreto de Convivencia.

SANCIÓNS

No caso concreto de agresións ao profesorado, “intensificarase a súa protección a través da nova Oficina de apoio ao profesorado”, incidieron. Tamén se estabelecerá un novo réxime administrativo de infraccións e sancións de modo que, ante agresións aos profesionais docentes, se fixan consecuencias administrativas “proporcionais á gravidade dos feitos, que serán compatibles coas posibles responsabilidades civís ou penais correspondentes”.

Este novo réxime establece sancións económicas que van dos 300 euros das infraccións leves aos 15.000 euros das moi graves, segundo concretaron. En canto ás sancións para o alumnado, actualizarase o marco para responder ás “novas formas de conflitividade, mellorar a gradación e eficacia das medidas e incrementar a protección do alumnado e do profesorado”. As condutas contrarias á convivencia escalonaranse en tres niveis de gravidade, en vez dos dous actuais: condutas leves, graves e moi graves, en función da intensidade correspondente da resposta educativa.

Respecto das medidas correctoras previstas, para o caso de condutas de maior gravidade establécese a “suspensión da asistencia ao centro por períodos máis amplos ou o cambio definitivo de grupo, por exemplo”.

ACOSO E CIBERACOSO

No caso concreto de situacións de acoso e ciberacoso establécese, con carácter xeral, o cambio de centro nas ensinanzas obrigatorias ou a perda do dereito a continuar escolarizado no centro nas restantes ensinanzas, para quen cometa esta conduta. “Nestes supostos, a medida poderá estender os seus efectos á imposibilidade dunha nova matrícula no centro“, indicaron.

Por outra banda, incidieron ademais en que se actuará no eido da prevención a través do Plan de coeducación, cuxa finalidade é “educar no respecto á dignidade e na liberdade de cada persoa, fomentar relacións baseadas no bo trato e na responsabilidade e previr comportamentos de dominio, control, discriminación ou violencia”.

inación ou violencia”.