A patronal do sector do metal na provincia da Coruña e os sindicatos lograron “algúns avances, non significativos” nunha nova reunión celebrada coa mediación do Consello Galego de Relacións Laborais. Así o precisaron a Europa Press fontes da CIG, tras o segundo encontro entre as partes neste proceso de mediación. A primeira reunión tivera lugar o martes e o calendario continuará cun novo encontro este venres. Ademais, está prevista outra xuntanza o luns pola mañá, sempre que antes dese día non se acade un acordo.
FOLGAS POLO CONVENIO
As reunións chegan despois de varias xornadas de paros no sector do metal na provincia coruñesa. Os sindicatos reclaman un convenio “digno”, con melloras laborais e salariais, así como medidas contra a precarización. Á espera do que suceda na mediación, as centrais sindicais xa convocaron dous días máis de folga, o 7 e o 9 de xullo. Estas xornadas súmanse aos paros xa previstos para o 30 de xuño e o 2 de xullo, nun conflito laboral que continúa aberto mentres patronal e sindicatos tentan achegar posturas.
